بسمه تعالى
نبتدأ ان شاء الله ببعض القصائد
التي تخص وصول الحسين ع الى كربلاء المقدسة
1
سلام عليكم
--
--
--
موشح
--
--
وين عازم عالسفر يحسين وين -- روح ودعّ فاطمه بدمع وأنين
--
روح لمك فاطمه قبل المسير -- وگلها هم اوداعچ ابگلبي چبير
وأدري يمّه علم عنچ باليصير -- لاچن الله يمّ حسن هوه المعين
--
بچت عين الكعبه لوداعك تهل -- شافتك يحسين رايد ترتحل
تدري ماشي خطر دربك مو سهل -- شلون لو لرض الوطن عاد الحنين
--
وين رايح تگطع ادروب السفر -- أشلون بيك الوكت لوخان وغدر
ياحسين اهناك چن ارض القدر -- اي وحق ضلع امك وذاك الجنين
--
تعتمر رايد وتظعن بالضعن -- مو خواتك لو مشن يتروعن
ياحسين او بالدرب يتصدعن -- فوگ ظيم الوكت وأحزان السنين
--
روح يم جدك ابدمعك ودعه -- ونتّك يحسين اگعد سمعّه
وخبره ياجد للظلم مابايعه -- ولا أمد للذله ياجد الادين
--
سولف الجدك محمد بالتريد -- خبره أرد اعلن جهادي ضد يزيد
لو يكلفني يجد دم الوريد -- ودم أخوتي او تنذبح كل البنين
--
سيد عدنان الحمامي
__________________________
2
بسمه تعالى
سلام عليكم اسئل الله لكم ولنا حسن التوفيق في خدمة محمد وال محمد ص
--
--
--
المستهل
--
تودعني تودعني -- آنه امك تودعني
حسين اتوادع اويه امه -- يسمع فاطمه اتكلمه
تودعني تودعني
--
حسين ودمعه يتهامل -- للزهره يودعها
يسمع من لحدها الصوت -- تبچي ابحرگه يسمعها
هذا اوداع وين اتريد -- لمك ليش تفجعها
مو تدري الصدر مجروح -- والبسمار روعّها
وين اتريد وين اتريد -- يبني حسين وين اتريد
ضلعي يبني لتلچلمه -- يسمع فاطمه اتكلمه
تودعني تودعني
--
گاللها بحزن گلبه -- ويتلاهب دليله ابنار
يمّه عنچ امسافر -- هليله اصبحت خطار
وباچر احدي بضعوني -- ولا واحد يظل بالدار
عندي بس عليله اتظل -- ماتحمل سفر وأخطار
تبچيني تبچيني -- اعاينها تبچيني
كثرت للگلب همه -- يسمع فاطمه اتكلمه
تودعني تودعني
---
سمع من اللحد فد صوت -- صوت اختنگ بالعبره
ونتها ابضلع مكسور -- بألمها أتكلمه الزهره
يحسين المسير اطويل -- يبني ورحلتك خطره
وعني لو خذت ولياك -- گبر أمك منو ايحضره
لاترحل لاترحل -- يبني حسين لاترحل
گبري من يجي يمه -- يسمع فاطمه اتكلمه
تودعني تودعني
--
جاوبها ييمه الدين -- حرفوا كل معانيه
وعالذل مابعد اصبر -- ولا ارضه بعبوديه
ابدمي ارد اضحيله -- ولآخر نفس بيّه
حتى لو عدوي ايجور -- تذبحني مواضيه
اجاهدله اجاهدله -- ديني كون اجاهدله
وتراب الگبر شمه -- يسمع فاطمه اتكلمه
تودعني تودعني
--
ظل ايسولف او تسمع -- ويسمع من گبرها اونين
گالتله يرحانه -- المحمد يبني ورياحين
ولمك يبني چنت الروح -- ومهجتها وضواها العين
وحدك عالسفر ناوي -- لو كل الاهل ماشين
شبانك شبانك -- تظعن كلها شبانك
مو صدري نزف دمه -- يسمع فاطمه اتكلمه
تودعني تودعني
--
يُمه فاطمه الشبان -- واخوتي كلهم الطيبين
بحزام الوفه وياي -- يمه ابغيره متحزمين
عباس وثلاث ابطال -- ابسوح الموت معروفين
وحتى البلمهد يرضع -- ايجاهد رايد الهل الدين
رايدهم رايدهم -- يمّه المجد رايدهم
قربان الدمه انقدمه -- يسمع فاطمه اتكلمه
تودعني تودعني
--
نشدت يبني اختك وين -- زينب خل اكلمها
اودعها وتودعني -- عزيزة فاطمه امها
لختك من يباريها -- ابها المسره ويلازمها
ماريد الدهر يحسين -- منك يبني يحرمها
ترعاها ترعاها -- لختك يبني ترعاها
وعمرك ربي اليسلمه -- يسمع فاطمه اتكلمه
تودعني تودعني
--
منقول
للسيد عدنان الحمامي
ونسألكم الدعاء
