اضحك مع المتزوجين الجدد
السلام عليكم ورحمة الله وبركاته
هذي بعض المواقف اللي صارت لأخواتنا في الله المتزوجات حديثاً:
أولاً:
تقول الاخت زياراتها للمطاعم مع أهلها كانت قليله..
المهم أول ايام زواجها دخلت مع زوجها المطعم.. قال زوجها للجرسون جيب لي منيو.. وسألها وش تبين؟ قالت مثلك ابغى منيو..
زوجها تسدح من الضحك وهي تقول أحسبها وجبة أو طبق معين!!!
ثانياً:
وحده كان الخجل ذابحها.. تقول زوجها كان كل يوم يجيب لها الأكل في الفندق.. وهي البنت مسويه روحها ما تشتهي وما تحب ومن هالكلام.. وما غير تناظر فيه وهو يلهط بالأكل..
وذاك اليوم بالفندق جا الغدا.. وكالعادة زوجها سألها يلا يا ... تعالي نتغدى.. قالت لا ، كل أنت بالعافية أنا ما اشتهي ، وهي مييييييته جوع..
وشبع الرجال ودق الباب ذاك الوقت..
المهم زوجها طلع وغاب اشوي وهي قالت في نفسها أكيد إنه بيطول.. وما قدرت تمسك نفسها ومن كثر ماهي جوعانة ماسكة الدجاجة بكبرها وتأكل فيها !!!
وفي هذه الاثناء وش صار >>> طب عليها عريس الهنا وهي متلبسة بالجرم المشهود ومقبضه بيدينها الثنتين في الدجاجة والفم مفتوح عالآآآآآآآآآخر.. وقال لها ها اشوفك مانتي مشتهيه.. وهي خلاص دوروها مسكينة ما تلقونها!!
ثالثاً:
في وحده شعرها دايم يحتاج له سشوار مهوب ناعم.. المهم السشوار اخترب مادري وش صار فيه.. عاد هي ذكاءها قادها لفكرة جهنمية.. وش سوت؟
راحت على طاولت الكوي وانسدحت وهاتك تكوي بهالشعر..
وبرضه زوجها سوى لها صادوه يوم دخل واختنا في الله تكوي منسجمة..
الرجال انهبل على باله تزوج وحده ماهي صاحية!!
رابعاً:
وهذا موقف لوحدة بشهر العسل.. تقول كنت مسافرة خارج السعودية.. واشتهيت مطعم عربي الله لا يعيدها.. المهم لقينا مطعم لبناني ورحنا له وحطوا لنا طبعاا قبل ما نطلب زيتون ومخلل..
وجى الجرسون واقف فوق روسنا ياخذ الطلبات وزوجي يقول له الطلبات
وأنا احاول اصيد الزيتونه بالشوكه..
مير تطير الزيتونه وتصفع وجه الجرسون وهو ياخذ الطلبات..
قام قال عدنا في لبنان ناكل الزيتون بإيدنا..
عاد مير ما أسكت وأنثبر..
قلت غريبه حنا عدنا بالسعوديه نصيدها بالشوكه..
وماسكها زوجي علي للحين كل ما شاف زيتون قال هاه بالشوكه وإلا بيدك خخخخخخخخ!!
خامساً:
وحدة تقول انا متزوجة ولد عمي..
و أول ما تزوجنا رحنا بريطانيا منها شهر عسل ومنها هو عنده دورة..
المهم تقول مره دخلنا المطعم وأخذت المنيو وقعدت أناظر الكلام كله انجليزي وأنا ما اعرف ولا حرف بالانجليزي..
تقول هو اختار والجرسون واقف عند راسي يحتريني اختار.. قال لي زوجي تبين أساعدك بالاختيار؟
قلت: ليش طايحة من عينك أنا أعرف أختار..
المهم تقول اخترت طلب محطوط في إطار وحركات.. قلت: أكيد هذا شي حلو..
وقلت: أبي هذا.. قال زوجي متأكدة؟ قلت: ايه اصلا من زمان أطلبه لما كنت أطلع مع أهلي
تقول قال لها: طيب ابشري وهو يضحك..
ويوم جابوا الطلب هو مكرونه وحركات وأنا وجبة أطفال !!
سادساً:
يقولون فيه وحدة تستحي من زوجها بالمرة.. تضايق الزوج وكلم خواته يكلمونها ، وكلم أم زوجته كذلك..
المهم أزعجوها امزحي مع زوجك أمزحي والعـبي واضحكي معه.. قالت ما أقدر.. المهم طولوا عليها بالكلام..
وفي مرة من المرات وهي مع زوجها سبقها زوجها بينزل من الدرج.. قالت فرصة أمزح معه شوي علشانه مايشوفني..
المهم دفته مع الدرج!! إلا وهو في آخر الدرج متشقلب وقاعد يون ويصيح من الألم.. قالها وش فيك كذا؟
جلست البنية تصيح وتقول كله من أهلك يقولون امزحي معه وهذي آخرتها!!
سابعاً:
بقولكم اليوم عن وحدة أعرفها أول أيام زواجها.. تقول كنا طالعين واحتجت الحمام مررررررررررة بس مستحيه اقول له.. وهو شكله ماعنده نيه يروح لمكان فيه حمامات..
المهم تقول عجزت اتحمل وجلست أفكر بأسلوب حلو ما يخرب برستيجي عنده.. قلت خلاص بقوله ابغى دورة المياه أحسن من كلمة الحمام..
تقول وأنا ميته من الفشله ، قلت أبغى اروح لدورة الحمام!! مادريت إلا الرجال يضحك ويقول يا عيني على الاتيكيت!!
ثامناً:
هذي وحدة تقول أول ما تزوجت كنت أدرس وكان يوديني زوجي للجامعة وياخذني ..
المهم .. أنا جالسه انتظره وكنت واقفه في الشارع وأشوفه بعد كم سياره .. المهم جلست استـناه..
يوم وصل عندي .. وانا امشي بغنج إلا وأطيح ذيك الطيحة طراااااااااااااااااااااخ
جلست على ألارض ما يشوف إلا رأسي من عند شباكي جالسة أناظره ولا أتحرك ..
وكان الشارع مليان رجاجيل وبنات..
وأركب في السياره وهو ميت من الضحك وأجلس أصيح قلت ما تعرف تسمي علي !!
وأخيراً:
هذا الموقف قرأته بمجلة .. وحدة تقول أول ما تزوجت طحت عند باب المطبخ.. وانهبل زوجي وقال بسم الله عليك سلامتك حياتي..
وبعد مرور سنة طاحت بنفس المكان قالها عمى ما تشوفين!!
