ألى الصحابي الجليل ميثم التمار (رض)

رسمت للكوفة لوحة وبيهه مصلوب
ميثم عل جذع وتباوع الناس
وكل ظني رسمت السانه مگطوع
طلعت راسم چفوف ويمهه عباس
دوختني لوحتي وشدهت البال
وخلتني أخاف وگظني وهواس
أباوع ع الجذع مو جذع مرسوم
رمح مرسوم عمي وشايل الراس
أباوع ماكو كوفه وهاي الطفوف
مرسومه بلوحتي بأجمل احساس
خيم راسمهه أني ابلا فكر ليش
لأن بيهه يتامه ابلايه حراس
ورسمت الخيل كلهه بلايه رجلين
لأن ما ريد صدر حسين ينداس
ودنيت الفرات بصف الخيام
لجل تروه الخدر غصبن عل انجاس
ودنيت الكفر عن زينب هواي
لأن صعبه عليه اگبالي تنگاس
وللعباس رديت اني الچفوف
لجل يرجع يشيل السيف والطاس
والسبعين الف دنيتهم غاد
وجبت يمي الصحابه الكلهه نوماس
صح سبعين همه انصار الحسين
لچن واحدهم بمليون ينقاس ؟؟؟
ودورت اعله ميثم وين موجود
وگلبت اللوحة كلهه بگلب ملجوم
أباوع ماكو ميثم ماكو الاصحاب
وبعد ما شوف كلشي وخلص اليوم
ولأن الليل صار بلوحتي بساع
ركزت بلوحتي شبيهه مرسوم
طلع مرسوم بيهه الگمر عباس
وميثم والصحابه بصفه النجوم
وركزت بلوحتي هواي يا ناس
وطلع راسم عراق وينزف هموم

للشاعر المبدع
احسان القريشي

قصيدة جميلة جدا ولوحة ابداعية رسمتها انامل الشاعر الكبير احسان القريشي

شكرا لنقل القصيدة

شكراً لنقلك شاعرنا المبدع جابر

وسلمت أنامل الشاعر أحسان القريشي

ننتظر المزيد

شكرا لك يا جرح العراق ...
والقصيدة للشاعر أحسان القريشي ...

حقا انه لرسم بالكلمات

وفقت في النقل اخي اكرم

لك مني كل التحايا

شكرا لمرورك