قصيدة للشاعر صباح امين بمناسبة اربعينية المرحوم الشاعر الحسيني علي حسين التلال

قصيدة للشاعر صباح امين بمناسبة اربعينية المرحوم الشاعر
الحسيني علي حسين التلال--منقول


ماعدها الارض ذمه ووفه وذات=اذا نزلت بيها فكر صاعد
وماعدها شرف هاي السماوات=اذا عالمقبره باعت عطارد

-------------------------******--------------------------------
وصيت ورحت عالشعر وصيت=قارورة ضوه ردت المحابر
ولعذرية الشاعر تمنيت=ماتخدشها افكار الاظافر
وشكد ياحفات الشعر ناديت=مو كل جرح هوه شفاف شاعر
لاكل جنح تحترمه الفضاءات=لاكل زاويه محراب عابد
هوايه حذرت انته الحمامات=خفت عليها من قط المساجد
---------------------------------------------------------
وصيت وقرعت ابواب الاسماع=ليصير الشعر اوراق تعليب
كسرة حرف صادق ينبض اشعاع=افضل من تنانير الاكاذيب
الفكره تنولد من رحم الابداع=كتلي وارفض اطفال الانابيب
كتلي من الرفض تنولد طاقات=وتطلع من ضوه الظلمه القصايد
ومرفوض اليدك باب الخرافات=وسجادة صلا من حانه رايد
-------------------------------------------------------
كتلي لو يبس شريان الاحساس=بخيوط الحرير يلفك القز
ولهل الكهف كتلي اقرعت الاجراس=لاهمه ولا صاحبهم الفز
كتلك يمكث اللي ينفع الناس=اما الزبدفوك الماي يهتز
كتلي الزبد شو اصبح عمارات=وطفلنه بلا سقف عالجوع هامد
وصار اليوكف اكبال المرايات=ويمشط شعر غيره مجاهد
-----------------------------------------------------------
انته ياعلي بهيئة النسمه=بس عاصفه تهب اعله الاسافل
كتلي لو لحم مشوي اشمه=احس قلب الفقير اعله المناقل
عصافير الضوه بعازة اللكمه=وغوغاء الجراد اعله السنابل
نهرنه اكبال عينه تموت شتلات=وعلى سرير الخدر بجروفه راقد
اكبال الخبز كتلي لو طفل مات=صب لعنه على ريش الوسائد
-------------------------------------------------------
كتلي الشعر معدن واليصهره=لو حدوة بغل لو سيف مصقول
سويه حجر سجيل وامطره=عالراس الذي بكل رقبه محمول
احنه السامري وعجله تكفره=وهمه بالمعالف ربو عجول
مبادئنه اعله وجه الخوف بصمات=الها وعصر الانياب النه شاهد
ومبادئهم اشو صارت هوايات=نساء وفاكهة وايدي وموائد
-----------------------------------------------------------
مايومك خدعته بومضة الغد=وترفض تستحم عين ابجيها
وكتلي حته يوم الضوه الاسود=الحره تجوع ماتاكل ثديها
وكتلي النجف حضره بوسط معبد=صيرو اعمده وشموع بيها
شفتك والتعب بعيونك يبات=تشبه سيف من الغزوه عائد
صدرك ياعلي مستودع اهات=وبضفاف الجرح ايوب كاعد
------------------------------------------------------------
ردت الواعي عقله بكل فضه يطير =لايعتمد جنح الواعي عالريش
وسلم ردت هذا المنبر يصير=العالم بي حسين ومبدءه يعيش
حسين الصدك مو حفنة اساطير=وغيبيات تحجيها الدراويش
حسين انطه شمس والضوه الماساة=من عدنه يريد عيون راصد
نستلهم فكر مو فقط دمعات=بيها نبلل ابواب المراقد
-----------------------------------------------------------
وصيت ورحت والوجه ماراح=مراية وفه ظل اكبال كل عين
كتلي بالشوارع صير مصباح=ولاتسمح لافكار الدرابين
ومن اعماق صوت اسمه دمع صاح=مكروهة الخلافه بعد ابو حسين
ضد الله ضد الشعر نزعات=عد الصفر قصده يصير واحد
واسف ياهواة النور شطحات=قلم ما مد لسانه بحبر فاسد