ياحسين شلون أنصف بالكلام ؟؟؟

ياحسين شلون انصف بالكلام ==== وذره التراب اشتوصف من جبل
انته كبل الدنيه سماك اللاه ==== وبالعرش مكتوب وي خير العمل
اذن جان الحكمه باسراء الرسول== هي التعريف بفضلكم على الملل
وانت خامس رجل ويا اهل الكساء == وحتى جبرائيل بعدك من نزل
ياحسين وانته بس اسمك اصول == يحير بيهه المعنى وتيه الجمل
يابن بنت النبي وفحل الفحول== الكون اشرك لاكن بجفك عدل
يعني لو نفرض فرض ماكو الحسين == ولاكو طف ولاكو ثورة ولا نسل
جان بس الاسم ضل من الكتاب == وجان لسه الدين عدهم معتقل
وانته آيه من الكرم عند الالله == وبل اليقين المعرفي وانطه العلل
بالسفر قصر الصلاة واجب اكيد == وجوه كبتك ما تقصر تكتمل
اذن بيت الزاير بصحنك يصير == وهذي اسما من الكرم يبن الفحل
ولا تكلي الطف بعيدة ومن زمان == احنه عدنة حسين كل ساعة نكتل
لأن عدنه بمعتقد كلش بسيط == فاطمة تلم الدموع من المقل
وبل قيامة دموعنه تشيل الذنوب == ودمعك على حسين كل ذنبك غسل
كلي اريد اسأل اذا دمعك يزيل == ذنبك وعند الله يبريلك خلل
اذن دمع حسين بالطف آية جان == وعاب كلمن ما قره الآية بخجل
قبلة والله تصير كاعج كربلاء == وبالدفن التراب من دمه غسل
واني عندي بهاي اثبات ودليل == ابيت كل شيعي الدليل من الازل
ضوك من التربة من تنوي الصلاة == وكلي احلى التربة لو طعم العسل

كاميران عبد عداي