ادور عالوفه بدروب الايام مثل اللي يدور جفن للعين
بليد اومو فطن عايش بالاوهام اولبست العقل ثوب المجانين
000000000000000
أمشي والضياع بخطوتي يسير وبرمل السؤال يغوص جدمي
او على كلبي من أذب لوعة التقصير احس يعربد بشريانه دمي
او بظافيري اذا احفر الف بير ميصح ماي بيه يستحم همي
غريب الدرب بعيوني والاجدام وتطول المسافه سنين وسنين
خريف العمر بيه تعصف الالام او شيرجع ربيع العمر مرتين
---------------
أمشي والقلم طفلي او سلوتي او من دم الكلب يرضع مراره
وذا شرياني جف وتجف دمعتي أعصر فكري وسكيه العصاره
او علمته اذا مزكوا ورقتي ايقدم للمكص هو اعتذاره
وذا كسروه لايتحول سهام غصن زيتون يفرع على الجفين
او كتله العبره مو بالصله والصام اذ ا مو كلبه طاهرعاله عالدين
------------ا-
أمشي اوصور تعرضلي المسيره وبهالصور ياأخلاق ألكه
واحد من أجل يدفه ضميره يلزم كل غصن أخضر يحركه
اوواحد لو أرق صابه بسريره يقتل بلبل بحجة البكه
اوجم دره يذلها شفت فحام او جم قرآن بيه تقره الشياطين
اوجم صياد سوه ششبجته إلثام اوطير الحب يبيعه على الشاهين
أمشي اورايي هم يبحث على راي اوذيب الزمن عينه إعلي تشبح
مثل طير بحماده يدور الماي اولا واحة امل وبفيها يسبح
لكه بس الذي لجناحه شراي او هيهات النفس بالبيع تسمح
اليبيع الجنح ماينعذر ينلام والمكصوص تفترسه الحواوين
حمل روحه بعطشها او عالصبر حام اوضل عطشان ماباع الجناحين
----------------------
بعد ذاك التعب والعطش حطيت على تل الصبر خذت استراحه
لن نسمه بشذى الايمان شميت اولن طير التعب يفرش جناحه
لن شلال هذا بشوفته رويت لن بجانب التل أحله واحه
يروحي لو حلم صدكي الاحلام لعل او عسه بدور اليقظه تروين
اولن صوت الحقيقه يصيح لتنام هالشلال هذا بواحة حسين
-------------------