لاتخجل بعد وكت الخجل مات
ولاتحتار ابد ماتسوه لتحير
كبل ماتحجي اعرفك رايد تروح
روح احركهن الدم والتصاوير
واذا خايف البير يطلع الاسرار
حته البير راح نذبه بالبير
عرفتك من الاول هدة الاعصار
وتسد باب السما بوجه العصافير
انه مو جنح يمك ذبته الريح
بكيفك ينكسر وبكيفك يطير
مناشير أدري بيك وكلبي تابوت
وكمت ذبيت كلبي على المناشير
انه جبت الدروب مغمض وياك
وادك روحي على بابك بسامير
وجبتهه وياي عمرك تلف وتدور
وانه على تراب خطوتك روحي تدير
وسلمتلك عمر ماقصرت بيه
وكضيت العمر وياي تقصير
نواعيري انتهن لان مايك بعيد
الخلل بالماي مو صوج النواعير
بمواعيدك بعد ماصلي للموت
صرت ناطر وانتظر بالمواعيد
على جرفك عمر تانيت الهلال
وصل بس موت منك ماوصل عيد
صرت شاعر حزن واقرالك جروح
شما يكضي الجرح من وحده يعيد
وشيب باب كلبي وبعده مقفول
وحته على القفل طلعن تجاعيد
اجيب اول نفس خلصته وياك
واجي بأخر نفس وتكلي شتريد
عصفورة على بابك حطت الروح
زحمه تحشم عليهه المصاييد
بعد ماريد منك كلشي يفلان
بس انطيني روحي وبعد ماريد
[size=24]منقووووووووووووووووووووول[/size]